Ep - 5 : Engkim mai hi...

            Engkim mai hi a nih tur ang hian kal mai se, engkim hi a fel in a dik mai a lo ni. Kan tih tur dik tak kan tih leh kan tih loh tur kan tih loh mai hi khawvel siamthatna atan a tha ber. Ni chu ni, nilo chu nilo. Kan thanmawhbawk hi han chhui han chhui mah ila a bul chu mi pakhat emaw aia tamin a tih tur a lo tih that loh vang te a lo ni duh chawk. Mihring inzahtawnna kan neih theuh avangin hmaichhana inhrilh tawp a harsa thin. Hrilh hnu pawha a ngai reng kan ni thin hi chu a dik lo a ni. Insiamthatna tur kan inhre lo anih pawhin chakna thar kan dil fo a ngai, mihring hi chu tisual thei dinhmun a ding reng kan nih avangin tawngtaina neih tam hi a tangkai a, Pathian in min zirtir turin Thlarau Thianghlim min pe a, min zirtir dawn a ni. Thuawih taka lo dawnsawn mai tur. Ka rawngbawlna ka hlen loh hian kei aiin ka rawngbawlpui, ka rawngbawl sak te hian an tuar a, sengkhawm sa tidarhtu ah ka tang thei a ni. Kan inpe anih chuan thuawih turin, mi tangkai ni turin, theihtawp chhuah tura inpe kan nih angin kan inpekna tihlawhtling tura beisei kan ni. Kan hlen zo lo anih chuan hlen zo turin hma kan lak a ngai, kan thei ngang lo anih chuan inhnuhdawh mai tur ni awm tak a ni. Ruat kan nih pawhin ruat kan nihna kan pawm anih si chuan kan mawhphurhna, kan tih tur chu hlen tur a ni. Title hian mawhphurhna a keng tel a ni. Theih zawng leh theih loh zawng chu kan nei theuh mai, kan tih theih reng kan tih loh hian a pawi ta thin a ni.
            Kristiante tum ber chu Thlarau bo chhandam a ni a Thlarau bo kan chhanchhuah leh si loh chuan kan hlawhchham a ni. Nihna kan neihte pawh hi thlarau bo chhanchhuahna tura hmahruaitu nihna a ni. Kan inhriat ai hian kan pawimawh a, mite nun kan khawih a ni. I inthlahdah lovang u, chak lehzual zawkna chu I beisei tlat ang u. Kan inthlahdah loh zawngin a hun takah kan seng dawn si a.
            “Sipaihote LALPA chuan heti hian a ti: In kawngte chu chhut ngun rawh u.” - Hagaia 1:7