Ep - 4 : Easter Sunday

            Easter Sunday lo thlen rual hian kumtin, zing ni chhuah hma a, Salvation Army Corps Band hrang hrang ten ‘A tho ta!’ ti a Krista thawhlehna hriatpuina tlangau pui thawm rimawi khawpui hmun tin a thangkhawk chuah chuah hriat te hian thinlai a va’n dek thin em! 2009 Delhi Safdarjung bial zaipawl in 'A Tho Leh Ta' action nen a kan sak tum te pawh a ngaihawm vung vung khawp mai, a tawp dawn a ban kan phar sual zauh bakah kan lo 'whoo!' hma hret lehnghal a; ka ding langsar ropui si a ka zak ru ve khawp mai khatih hunlai kha chuan. Dr.Manuni ka bulah a ding hlauh a ka zak lo der mai mai. 

           Kristian te vanneihna, thihna pawhin a ngam loh Chatuan Nunna peka kan awmna ni champha kan lo thleng leh ta. Chhiartu zawng zawngte Thawhlehna Ni Champha, Easter Sunday chibai ka buk a che u. Min thlahtu hmasa Adama leh Evi te’n dan thupek pakhat an bawhchhiatna chuan nasa takin anmahni leh an thlahte min nghawng a, van indona nasa tak chu mihring te chungah a lo tla ta. Ngaihdam kan nih theih nan Pathian Fapa thisen ngei a inthawi a ngai ta tlat mai, a rapthlak in a va ropui em! Adama leh Evi chuan dan pakhat an bawhchhia, keini hian engzat nge kan bawhchhiat ang le? Vawikhat bawhchhiatna chuan nghawng thui tak a nei. Kan Pathian hi mi namai a ni lo, a thu a sut leh ngailo, sut leh ai chuan a Fapa pawh thi hial khawp a hrem chu a rem a ti zawk hial a ni. Kristian Sakhua vuantu nih ringawt hi a tawk lo, Kristian dik tak kan ni ngei tur a ni. Juda Iskariawta chuan tangka tlemte in Krista chu a hralh a, a phatsan a, keini erawh chuan TV te, changkang lo nih hlauhna te, Computer games te, internet te hmangin, hna lama buaina te, mut mai mai thlan zawkna hmang te in, kan nuam tih zawng hmangin Krista hi vawi tam kan hralh mek a ni.
             Kan hnathawhna / zirlai theuh chu kan ngaipawimawh tur a ni, mahse Krista hmasa zawk rawh se, LAL rawngbawlna hi a ve lek zawk a kan ngai anih chuan kan chan tur malsawmna kan dawng thei hauh lovang. Kristian chu hmasawn zel tur kan ni, hmasawnna tur kan nei theuh, chuvang tak chuan Easter Sunday hi kan hman tangkai a ngai ta, I chak lohna ata lo tho chhuak rawh, kan chaklohna te min hriatpui a min tanpui dawn a ni; nun thar, rilru thar, chakna thar, hlimna thar, malsawmna thar nei turin Easter Sunday ah hian  malsawm I ni e.