“Chuvangin benga kan hriatte kha thahnmengai takin kan pawisa lehzual tur a ni, chutilochuan kan tawlh bo hlauh dah ang e.” Hebrai 2:1. “Benga hriatna mai zawngin ka hre tawh chia, mahse, tunah zawng ka hmu ta che; Chuvang tak chuan ka inten a, vut leh vaivuta thuin ka sim ta e” Joba 42:5,6
Fiahin kan awm fova, thlemin kan awm fo bawk a. Thlemna leh fiahna erawh hriatpawlh awl hle mah se thliar thiam a tha zawk hle. Fiahna chu test a nih angin chhel taka tawrh a ngaihna hmunah a lo lang thuai thin. Kan duh loh zawng tak thil thleng a lo awm te hi fiahna a ni fo thin reng a. “Mangan ni a I chauh mai chuan, I rinna a bei tham a ni”. Thlemna erawh chu kan rilru in a duh ngawih ngawih thin, a chak ngawih ngawih, chhan mumal tak vanga kan bansan tawh ti leh tura fuihna leh palzam tirna a ni. Thlemna hmanga fiah kan ni fova, chu fiahna paltlangte chu Pathian ngaih a mi lian te an ni. Thlemna paltlang hnuah pawh chuan fiahna a la awm ta fova. Kan chak lohna hmunah ngei mai fiahin kan awm thin; chu fiahna paltlang leh tuar tang tangte chuan malsawmna duhawm tak an chhar chhuak a, thununna khirh tak leh tawrh hrehawm tak an paltlang takte pawh chu an tan lawmna tizualtu a lo chang thin.
Mi luhlul nafam chu Pathian hrechang lo lek in ka lo khawsa leh ta a, Pathian tana ka rinawm thin tluk zet chuan ka rinawm lovin ringlo mi te nen danglam map lovin Diabola chuan min man bet a. Chutihlai chuan tumahin ka hnenah lo kalin min tawngtai sak lova, chutiang ti turin tumah ka beisei lo bawk a. Biak In lam ka va hawi chuan an lo hmanhlel hlawm hle a; thalaite chu hla zir leh sport buai in an lo buai a, Nu ho lah chuan buhfai tham leh fehchhuahna tur an lo buaipui ve mek bawk a, Pa ho chu hnatlang in an lo hmanhlel em em a, naupang lam te pawh chu an chak zawng zawng tiin a velah chuan an lo awm ve bawk a, an hlim hle mai. An zinga hlim taka awm ve chu ka chak rualin ka ngaisang tehchiam bik chuang lova. Mi hmanhlel tak tak vek an ni, kei pawh chu zu zawngin ka buai ve viau tho a. Pathian khawngaihna ka chungah a lo lang a ka piangthar ve ta! Ka va lawm em! Mi buai tak takte karah chuan ka khawsa ve ta a, rin aiin a lo nuam khawp mai. Chutia hlim taka ka awm lai chuan ralkhata zu rui pakhat kan awmna lam hawi a min thlir dauh dauh chu ka va hmu a, nui suk chungin a inher a, a kalbo ta a. Chu pa chu Biak In atang chuan thenkhat chuan an hmu lova thenkhat chuan an hmu a, engtinmah ti lo chuan an tihlai chu an tih zawm leh ta mawlh mawlh a. Chu pa ang chu ka ni thin tih reng ka lo theihnghilh hman der tawh a. Ni reilote ah chu pa chu YMA tlangau in a boral thu a puang ta mai a. Pathian fak a ka hlim viau lai chu ka hlim thei ta reng reng lova. Ka hlim lohna avang chuan mawhpuh tur ka zawng ruai a, mahse ka hmu zo si lova.
Ka hlim lohna chu Setana min beihna ah puh in ka buai ngai chuan Biak In lamah chuan ka buai chhunzawm ve leh ta a, mahse chu hlim lohna chu eng vanga lo awm ngawt nge tih chu ka la hrethiam chuang lova. SAY Fellowship ah chuan ka hla duh ber mai, ropuina a ka kaisan hunah pawh he hla hi chu ka ruang chunga sak atana a ka hual ngei mai, General John Cowans hla phuah, "A hmangaih a ngai reng fo, chiang takin a hria che, sawmna hnar tawh vangin beidawng lo la, a diltu hnenah a pe a khawngaihna mak chu, a hmangaih che a la nghak reng a che" tih hla chu kan sa a, thinlung zawng zawngin ka sa a, ka tan a phuah bik ni hliah hliah hian ka hria. Mittui tla zawih zawih chuan mithar ka nihna chu ka lawm a. Ka hlim em em lai chu a tawp leh ta thut. A chhan zawt in ka fianrial hunah chuan Pathian hmaa ka inlan lai chuan ka zawt ta a, chhanna ka dawn chuan ka duhna lam lamah min kaltir thei ta lo, "Ka tih tur chu ka hlen zo tawh, nangin I tih tur I ti ve em?" tih zawhna chuan ka damchhung hian min umzui tawh ang.
Krista Isua in, "I tih tur chu ti rawh le" a tih ve tho Juda Iskariota kha Isua zirtir sual tak anih kan hre lova, Lal Isua a phatsan hma kha chuan. Isua kalna apiangah a zui ve a, tih tur tul apiang pawh ti ve in, Lal Isua zirtir leh rawngbawltu a ni ve reng a. Mahse fiahna hun a lo thleng ta! Tangka awhna avangin a phat ta mai kha a ni a, chhuan zawng zawng dem a hlawh a, 'phatsantu' tiin kan kawh rawn tak hi.
Juda Iskariota sualna chu kan hmuchiang kher mai, 'chuti chuan ti zawk se' kan ti thei fur a, mahse keini hi enge maw ka nih bik le? Ani aia kan felna chu enge ni? Juda Iskariota kha chuan a sur a sa hnuaiah a zui; keini hian chutiang chu kan ti ve em? Juda Iskariota khan vawi khat a phatsan; vawi engzat nge Lal Isua hi kan lo phatsan tawh? Juda Iskariota khan rosum awh vangin tangka in a hralh a, keini chuan tangka chu sawi loh, phatsan theih dan kawng awm zawng zawngin kan phatsan a ni lawm ni!
'Ka phatsan ve lo' tiin I la tang em? I tih tur I tih loh khan I tih loh tur I ti tihna a lo ni a, chu lo liama phatsanna. Lalpa aw hi chu kan hre thin a, mahse kan hnena thu lo sawi ve reng hmelmapa aw zawk, a tak ang ve tak chu kan zawm thin a, mahni inthiam chawp in kan thiltih te chu theihnghilh a pawm zam kan tum thin. Thil pawmzam hi a thatna lai awm ve mah sela sawi tur tam a awm lo. Rilru fim pawh hmang lova tih mai mai hi setana lawm tawk rawngbawlna a ni. Rawngbawlna ngai a neih hi a tha viau e, mahse hmangaihna tel lo rawngbawlna chu darbenthek ri mai mai ai pawhin a hnawk zawk. Pathian rawngbawl nia inngai si in mahni rawng kan bawl fova, mi ten an hlut leh si loh in kan vui a, mawhpuh tur kan zawng ruai a; a bul fuk, keimahni erawh chu ngaihtuah chhuah pawh kan duh lo.
Tumahin kan tidik vek seng bik lo, Juda Iskariota te, Simon Petera te pawhin an thei bik lo; hre reng chunga I tih loh erawh chu sual a ni. Thudik hriat hi kan diklohna ah chuan hriat a nuamlo thin, tupawh chutiang chu kan ni e. Nimahsela, tlawm ngam hi ringtu nun ah hian a lo pawimawh a nih hi. Dikna leh felna kan um tur a ni, chutih lai chuan kan dik lohna ah chuan kan tlawm ngam apiangin Lalpa ropuina chuan min chhuntlang thin dawn a lo ni. General William Booth chuan. "The greatness of a man's power is the measure of his surrender.", tiin a lo sawi tawh a, "Mi chak tehna chu a inpumpekna/inphahniamna atangin a ni" tih pawhin duhlian tawngin a lehlin theih ang.
Mi pakhat ringawt pawh hi kan pawimawh a ni. Miin a diklo zawk an zawh mek tih hre chunga kawng dik ka hriat chu ka kawhmuh si loh chuan ka tan sual a ni. Kawng diklo zawk chu dik emaw tiin kum tam tak zawh ta sela, a tawpah chhiatna thleng ta si sela ka chung a va pik dawn em! Pathian lawmzawng a ni hauh lovang. Dik ni a kan hriat a lo dik loh pawhin a dik zawk chu pawm ngam hi a huaisen thlak hle. Kan pianthar tirh hian kan famkim nghal lo tih hi kan pawm a mahse famkim nghal ang maiin kan inngai lawi si a, zirlai (student) kan nihna kan theihnghilh a, a hun lovah zirlai kan nihna kan hmatheh leh si chuan a diklo vel vek tawh tihna a ni thin.
Kan dik tur a ni, tawngka maiin Lalpa kan fak lovang. Mawihnai zawng a Lalpa rawngbawltu chu hlawhfa mai a ni. Kan felna te hian kawng tinrengah ringlo mite felna a khum si loh chuan enge kan danglamna? Khawi ramthim hian nge khawnvar chhitu ah min ngai ang? Hei hi inzawt teh, thiamloh chantir thei che engemaw I ti mek em? Ka chanchin hi ziakin awm ve ta sela Juda Iskariota chanchin ang mai hi a ni angem? Tunah hian mi rinawm ka ni em? Huaisen takin ka chhanna hi Lalpa hmaah ka dinpui ngam angem? Eng chu nge ka tih tur chu le?
