Kum 2011 chu kawng chanve kan lo zo leh ta der mai! Hetih rual hian mitin te eng chen in nge ‘din thar’ kan nih tawh le? Kum bul lama kan dinhmun atang khan hma kan sawn nge kan hnungtawlh le? Pen khat lek tal pawhin hma kan sawn em nge ni a kan ngaihdan pathian chung zelin ‘hmasawnna tur ka nei ve lo, ka ngai ve lo, ka tha tawk a ni’ kan la ti tluang zel zawk? Ringtu nun chuan hma a sawn tur a ni a, hmasawnna hian thankin ni reng a nei lo. Kan Bibul han bih chiah mah ila, engkim hi chihnih ah then phawk a ni zel a, ‘I lum a I vawh si loh avangin..’ titu hian hmasawn turin min duh a ni. Hma kan sawn lo anih chuan kan hnungtawlh tihna nen a lo inang reng mai!
Krista Sipai huaisen chu Sipai Hote Lalpa hmaah a tlawm ngam tur angin kan dinhmun I han in ennawn leh teh ang u, ringtu zawng zawngte chuan indona thianghlim kan bei a ni. Hmasawn thei tur chuan kan famkim lohna lai pawh humhim mai lovin kan tlawmsan a ngai fo a ni. Mi famkim tumah an awm lo tak a, mahse Jehova hian chumi rilru pu reng tur chuan min duh hauh lovang, kan chaklohna te pawh chu hmanrua ah hmangin kan chakna ah min siam sak a tiam a, he leiah hian famkim dawn lo mah ila kan theihtawp a hmasawn chu kan chanah ruat a ni si. Kawng dik zawk min kawhhmuh turin Thlarau Thianghlim a inpeih e, sawmtute a hnar ngai lo. Tunge Lal tan ding ngam a, dikna tan ngam a, din thar lehzelna thlahlel tute chu? Hei leh chen min Hruaitu hian min din thar a duh a ni, nang leh kei hi ring tikhauh zingah kan tel palh ange.
