[Believe it or not, i won the SAY (Salvation Army Youth) Article/Essay Competition 2011. I felt a bit awkward and a bit shy to post my inglorious skill on literature; but since i got nothing more to share as of now, i'm posting it, just in case you wanna know. Its totally unprofessional, only constructive criticism please.. lol... (i have to post this one in Mizo as submitted in the competition, sorry to all my friends who can't read Mizo.. hope you'll understand... (its a bit long.. hihi) .. )] ^^
Chhandamna Sipai Pawl chuan kum 2011 thupui atan ‘I din leh ang u’ tih chu a hmang mek a, hetiang a thupui tha leh rinna kaihruai theitu thu khawng tak si leh nem tak si kan nei hi Chhandamna Sipaite kan vannei hle. Nehemia in Jerusalem kulh a tundin dawn khan “mite sawichhiata kan awm tawh loh nan, hawh u, I din thar leh ang u” tiin a mite hnenah a lo sawichhuak tawh a. He thu hi kum 1000 chuang liam tawh a sawi ni tawh mah sela vawiin ni thleng hian intuaithar nan, insiamthat nan a mi fuihtu tha tak a la ni reng a ni.
‘Din thar’ chuan bul tanna a kawk a, ‘din leh’ tih chuan din tawh sa tluchhe mek tundin lehna a kawk a ni. Din leh tih chu din thar tih nen thuhmun a sawi kawp a ni fo bawk a. Mahse tunge, enge din leh ngai chu? Engtia din leh tur nge? Tu in nge din leh dawn? Eng hmanrua nge hman tur? Chhanna a va kawkalh thei si em!
Chhandamna Sipai Pawl chu Pawl anih angin Pawl reng reng chu mi 1 aia tam intelkhawm, tum bik (goal) nei leh an goal tihlawhtling tura chak taka hma la a intelkhawm an ni thin. Pawl reng rengah member tin hi an pawimawh a, member tel lovin Pawl a awm theilo a ni. Chuti a lo nih si chuan Chhandamna Sipai Pawl din that leh nan chuan mimal (member) tin te an pawimawh ber tihna a lo ni ang. Hruaitute pawh Pawl member atang thovin a ni an lo pian chhuah.
Mimal tin te han inen (analyze) ta ila, kan member nihna Pawl ah hian kan chiang em? Kal pah mai mai a pawl member nih hi pawl thatna tur ber a ni em? Khawvel thil takah pawh pawl member kan nih chuan pawl dan in a phut hmasak ber chu ‘rinawmna’ a ni vek a, Chhandamna Sipai Pawl pawh hian pawl dang ang bawkin member tin te rinawmna a ngiat a ni. Chumi kawngah chuan kan tlakhniam tak avanga ‘I Din Leh Ang U’ tih thupui hmang kan niin a lang.
Member tin ten hmasawn a din thar kan ngaihna lai hre tur chuan tuna kan dinhmun hriat chian a ngai a, tun dinhmun (present condition) hre map lo chuan din thar ngaihna lai ber hriat fuh a har hle ang. Tuna kan dinhmun hriatchianna leh kan nihna tur dik tak khaikhin in hmasawn kan ngaihna lai, din thar kan ngaihna lai hriat a awlsam ber. Chutah chuan tlabal lai te, awmlo lai te, awmlo tur awm te a hmuh theih a. Chutiang a lo awm zeuh pawhin chulai chu siamthat tur lai, din thar ngai lai chu a ni. Thir hi a chang tha a, a rinawm viau lai hian a hmun lo tura pawng emaw kawi a awm chuan a hnawksak a, rual a pawl lova a tangkai tur angin a tangkai zo lo thin. Thir chhut mam nan rawhna mei a ngai a, chutiang chiah chuan Thlarau Thianghlim, mei anga kangfai thin chu min siamtha turin, min chhu ngil turin kan mamawh a ni.
Din thar kan ngaihna, kan chaklohna te chu mi tam zawk hi chuan kan inhria a, siamthat a ngai a ni tih pawh kan hre thin, mahse, kan chaklohna chu hmachhuan in van atanga thilmak lo thlen hun kan nghak chawt fo a, hei hi a dik ber angem? Insiamthat nan van manna kher beisei hi thawh loh hlawh lak tum ringtu nihna a ni thei angem? Thawk lo cuan ei pawh ei suh se tih inziak hi thlarau, rilru leh taksa lama hmasawn tura nawrna a ni. Thlarau Thianghlim hian tumah a tilui ngai lova mahse a nawr a, a tur thin a, hmanhmawh turin, dawhthei turin, insum turin, huaisen turin mi a fuih thin. Mahni dik lohna inhria a insiamthat ngam hi mi dik lohna sawichhuah sak a siamthat tum aiin a huaisen thlak zawk a ni.
Thenkhat chuan ‘Ka thovang a ka Pa hnenah ka kal teh ang’ tiin chaklohna ata chakna beisei in sual an kalsan a, a famkimlohna ata famkim zawkna chu a um in a um a; thenkhat chuan ‘Amah chu ring la, Aman a ti vek ang’ tih changchawi in automatic a din tharna chu rilru thlamuang takin, an awmhmunah an lo hmuak ve mek bawk a. Pathian lehkhabu kan en chuan Pathian a chet dawn tak tak hi chuan a mite hnenah tih tur engemaw a pe hmasa zel a ni. Israel fate kha thawklehkhatah a chhanchhuak thei Pharoh lak ata kha mahse beramno thisen a inthawina te a tih hmasak tir phawt; Mosia kha a awm mai mai lai kha thusawm pek a pe nghal thei, mahse Mosia kha Sinai tlangah lawn turin a ti tlat; Lal Isua khan uain kha a duh chuan a tipung thut thei, mahse bel ah tui chhung khat hmasa turin thu a pe; Chhangper leh Sangha kha Lal Isuan engtik lai pawhin a tipung thei, nimahse zirtirte kha tih tur a pe hmasa a ni. A thlawn liau liau a malsawmna kan dawn hi chu a awm ngei mai, Chhandamna chu kan thawhchhuah a ni lo, khawngaihna vang a ni, nimahsela Chhandam apiang ten tih tur an ngah ting mai a ni. ‘Dil rawh u, tichuan a pe ang che u’, ‘Mi au la ka chhang ang che, thil ropui leh inthup I hriat ngai loh chu ka entir ang che’ tih ziakah te pawh hian a petu aiin a pek turin tih tur a nei hmasa zel a ni. Pathian in min tihsak chu hahni ro vek khawpin sawi tur kan hria ang, mahse Hmangaihtu hi enge I pek let ve le? A hmantlak ni turin eng chen hi nge I inpek? Din thar min duh a, malsawmna min tiam chu dawng turin din thar kan ngaihna lai kan surrender ngam apiangin kan chang mai dawn a ni.
Hmasawn lo chu hnungtawlh a ni. Nausen chu a pian tirh in tap chungin a lo piang a, nuih dan a lo thiam leh a, bawkvak in a kal a thiam chho a, a lo changkang leh deuh a ke in a kal thei ta a, a hnuah chuan a lo tlan thei ta a. Nausen mahni a tlan rawk rawk rual tawh si in tah ringawt a thiam chuan rualbanlo a ni anga, a nih tur ang a ni zo lo tihna a ni, a khawngaihthlak awm khawp ang. Nausen chu kal zirtir a ni thin a mahse a thiamna tak tak zawk chu amah a kal a zirna chu a ni. Kan dinhmun ngai renga kan awm chuan Pathian ram tan a va sawt duh awm lo ve! Malsawm a hnekin anchhia dawnna a ni.
Chak taka awm turin thupek kan ni a, chak taka tlan erawh chu tluk sual a awl. Midang ruala tlan thiam a pawimawh. ‘Ka tlu’ kan tih fo chhan tam tak hi chu thlemna tamna hmunah mahni kan inbarh luih vangte hi a ni fo a, tlan chak luatah min Hruaitu tur ber tlansan hi a pawi thin. Thusawitu pakhat sawi ka hriat reng chu, “Chirhdiak a kan awm reng chuan chirh kan kai nge nge”, tih a sawi kha a ni. Awmze ril tak a neiin ka hria. Chirhdiak a awm reng tih hre chungin kan kal lui a, hel mai awm tak hi Pathian rinchhan ve deuhreuh si in kan kal a ring tak tak leh mang si lovin. Mi tihdan kan hria a kan han ti ve tak na a a tibawrhbangtu ah kan tang leh lawi si a. Mahni leh mahni chhiatna kan inbarh hi a awm fo reng a ni. Rin ai hian thiamloh chang kan tam khawp ang rorelna niah hian, kan ngaih ang ngawt hi a ni dawn lo.
Politics taka rawngbawl hi Setana zia a ni. Politics han tih hian political party tihna ni lovin, mahni hmasaial taka rawngbawl, rawngbawl chhan aia rawngbawlna ngaipawimawh, lansarh duh vanga rawngbawl hi a ni. Chutiang rawngbawlna chu a langsar a, Pathian thu aiin style ah a kalral a, changkanna ah a zuzi mai thin. Mahni in promote tum ran chunga rawngbawlna hian Lal Krista hmai ah chirh an theh a ni. Kan rawngbawlna a changkang tur a ni a, a hunlai mil in style pawh a nei tur a ni ngei a nimahsela a hmasa tur hi hmasa se, a nih tur angin ni sela engkim mai hi a lo fel vek zawk a. Kross thu chu boral mekte tan chuan atna a ni reng a, awm ang ve takin kohhran rawng a bawl vak theih. Lucifera kha politician hmasa ber a ni.
Ringtu luhlul hi ringlo mi aiin an hnawksak a, hre ve luam si a zawm duh lo hi kan tam a ni. Pathian thu awihlo han ti ila thih ngam sakin an tang ngam leh lawi si a, tawngka maiin Pathian an fak a ni, hetiang hi chu Setana pawhin a thei, keini ai hian Pathian thu a zawm hnem zawk mah hial maithei. Pathian thuah chuan ‘Ring tikhawng tlat chu thawklehkhatah tih tliah in a awm ang’ a ti a, he category zingah hian mi tam tak kan awm ngei in a rinawm. Tunlai tawng takin ‘Mawl-Confi’ tih tur hi kan awm nawk maithei a ni thlarau lamah hian. Pawngpaw thlamuang ve ringawt, hria inti taka Pathian ngaihsak awm taka awm si a Pathian mite daltu ni tlat bawk si te chung a pik e. Chung mite chuan Pathian fate tan tlukna an siam a ni. Diabola hi ama kohhran (Setanic Church) ai chuan Kristiante kianga awm hi nuam a ti zawk a, a hlawkpui ve thei hle. Kristiante tihchhiatna awlsam ber chu pawm lam atanga bumna ni lovin chhunglam atanga bumna a ni. Chutiang bumna chu mi 1 lek a a hlawhtlin pawhin nghawng tam tak a nei a Setana ram a lo darh ta thin. Chutiang hmanrua nih chu tuman kan duh lo chung hian kan ni tlat si thin a ni. Sual la tem lo sualna phei chu a bet nghet in Krista tello Kristianna rei tak a neih theih. General William Booth hrilhlawkna te kha a thleng dik mek a ni. Simna tello piantharna hi Pathian ngaih a tenawm a ni. Piangthar hmingpu in, kohhran ah rawngbawltu rinawm tak a nih ve theih, Lal Krista hmel hliahtu rinawm tak nih hi thil har a ni lo.
Tumah sawiselbo kan awm lo; that tum, thei si lo, Krista zara fai mai vek kan ni. Mahse Krista hian min nghak reng dawn lo, hun tha kan neih chhun hi a liam thuai dawn. Talent min pek – zai theihna, tawng theihna, hna thawh theihna, etc. te hi Lalpa ram tan kan tihpun loh chuan Bible ngei a ziak talent tipunglo a hremna ang kha kan chang ve mai dah ange. Chhandamna hi utawk tur vawn chi a ni lova, khur zawih zawih chung pawh a hman tur zawk a ni. Anin min hria e kan ngaihtuahna zawng pawh, kan lungngaih chang pawhin kan tawngtaina min hriatsak. Krista hming putu te chuan kan ralthuam inbel a mahni ngei inhneh in Pathian ram la turin in din thar a hun tawh takzet a ni. Kan tih tur kan tih loh avang hian kan chhungkua, kan vengchhung, kan ram kan tichhe zo tawh. Mahni hi dik ila, Pathian lama kan tan tlat chuan kan ram kan hnam kan chhandam thei dawn zuk nia. Sipai hote Lalpa, a thutiam phelh tawh ngai lova khan a siam che Ama chen nan, chak tak leh huai takin lo awm phawt mai rawh. Mi ten min sawichhiat tawh loh nan leh Lal Krista an chawimawi theih nan hawh u, I din thar leh ang u.
